People / Relationships

Mwana wanje

200 Views

Mwana wanje,

Ehe ugeze mu bigero,

Ubu wabaye umusore/umupfasoni,

Mwana wanje nkundira ndakuganirire gato

 

Igihe twakibaruka

Ntitwari mu gihugu cacu

Wavukiye mumahanga

Kubera imvo nyinshi zitandukanye

 

(Mboneyeho n’akaryo ko kugusaba imbabazi

Kuba ntaragutembereza murico gihugu c’amavuko c’abavyeyi bawe)

 

Waravutse muriyi si yuzuye ubumenyi

Umaze gutangura kwavura,

Tuba tukujanye muma shure yambere

 

Utangura kwiga indome

Wiga kuririmba uturirimbo,

Gusoma A, B; mbere no kwandika 1, 2

Uko wagenda urakura

 

Hageze kukwiza imyaka 5,

Umaze kwakira ubumenyi butari buke

Koko wakuze mw’ isi iguha ubumenyi

Ubumenyi bukwiye ngo ushobore gutera imbere

 

Warize amashure meza,

Warize uburengazira bwose ufise:

Kuvuga ico ushaka,

Gutora ico wifuza,

Guhitamwo bivanye n’ico wifuza.

 

Warize kuvuga ego na oya;

Kuyibwira abakuruta n’abusumba

Bivanye n’ubushake bwawe

 

Hari ivyiza bitari bike aya mahanga yagutoje

Ariko Mwana wanje, wibuke!

Indero yose twagutoje

Ubwitonzi bwose twaguhaye

Ubutwari bwose twakuraze

Vyose vyavuye muri ca gihugu cacu c’amavuko

Twaguhaye ivyo twahawe n’abakurambere bacu

Twaguhaye uburere igihugu cacu Burundi caturaze

 

Mwana wanje, uzokwame wibuka aho wavuye

Ntuzokwirengagize ca kirimi cacu twakwigisha

Nivyashika ukamenya ivyongereza, ibifaransa,

Ibi espagnol, ibi suédois, eka n’izindi ndimi nyinshi

Uze wame wibuka ko twakwigishije n’Ikirundi cacu

Uze wibuke kucandika muzindi ndimi nyinshi uzi

 

Mwana wanje, ntuze ugire isoni ryo kuvuga iyo wavuye

Niwatwibuka nk’abavyeyi b’akarorero

Uze ushimire Uburundi

Kuko twaguhaye ico Uburundi bwacu bwaturaze

 

Mwana wanje, Imana ikugiriye neza Ukibaruka nawe

Uze wibuke gutahana uruvyaro rwawe

Nabo babone aho wavuye,

Aho abasogokuru babo baturutse

 

Mwana wanje, uze wame wibuka

Ko Burundi ari Uburundi Bwacu

Ritsa M.

 

 

 

ritsamwiza

Driven by Passion.
Born to impact and leave a legacy!
Made to worship and please my God.

You may also like...

1 Comment

  1. Aw! this is beautiful!! u Burundi buzokwama ari u Burundi bwacu!

Leave a Reply